faydety-logo-text

ايه هو نظام سويفت المالي؟ وازاي روسيا هتتأثر؟

تاريخ النشر: 27 فبراير 2022

عالم المال

ايه هو نظام سويفت المالي؟ وازاي روسيا هتتأثر؟

الشركات اللي بتزود روسيا بالسلع وتشتري منها، زي ألمانيا هتتأثر بالسلب

دعوات كتير بتطالب بإخراج روسيا من نظام سويفت المالي العالمي خاصة مع ارتفاع حدة الحرب بين روسيا وأوكرانيا، لكن ايه هو النظام دا وازاي ممكن يأثر على روسيا دا اللي هتعرفه دلوقتي.

 

لو عاوز تعرف تفاصيل أكتر عن سبب الحرب بين روسيا وأوكرانيا اقرأ دا الأول: ايه قصة لوغانسك ودونيتسك اللي روسيا اعترفت باستقلالهم؟

 

ايه هو نظام سويفت المالي؟

 

  • نظام سويفت هو عبارة عن نظام مالي عالمي يسمح بانتقال سلس وسريع للفلوس عبر الحدود.
  • كلمة سويفت - SWIFT – ببساطة هي اختصار لـ "جمعية الاتصالات المالية العالمية بين البنوك"، وبدأ النظام سنة 1973 ومركز الجمعية في بلجيكا.
  • نظام سويفت بيربط 11 ألف بنك ومؤسسة في أكثر من 200 دولة.
  • بس خلي بالك سويفت مش بنك هتقابله في الشارع لكنه عبارة عن نظام مراسلة فوري بيبلغ المستخدمين بموعد إرسال المدفوعات وتسلمها.
  • النظام دا بيبعت أكتر من 40 مليون رسالة يومية، وبيتم تداول تريليونات الدولارات بين الشركات والحكومات.
  • وحسب التقارير: المدفوعات الروسية بتمثل 1 % من حجم التعاملات عبر نظام سويفت.​

 

مين اللي بيملك نظام سويفت المالي؟

 

تم إنشاء نظام سويفت المالي من خلال بنوك أمريكية وأوروبية كانت رغبتهم الأولى إن مفيش مؤسسة واحدة بس اللي تسيطر على النظام المالي وتحتكره.

حاليًا الشبكة بيملكها بشكل مشترك أكتر من 2000 بنك ومؤسسة مالية.

اللي بيشرف على نظام سويفت المالي البنك الوطني البلجيكي، بالشراكة مع البنوك المركزية الكبرى في جميع أنحاء العالم، بما في ذلك بنك الاحتياطي الفيدرالي الأمريكي وبنك إنجلترا.

 

في وسط الكلام عن الحرب بين روسيا وأوكرانيا والعقوبات.. هل مصر ممكن تتأثر بالحرب دي؟ اعرف أكتر من هنا:  ازاي مصر هتتأثر بحرب روسيا وأوكرانيا؟

 

نظام سويفت المالي بيساعد في ايه؟

 

يساعد نظام سويفت المالي في إنه بيخلي التجارة الدولية الآمنة ممكنة لأعضائها، وليس من المفترض أن تنحاز إلى أي طرف في النزاعات.

لو رجعنا بالذاكرة لسنة 2012 تم حظر إيران من سويفت كنوع من أنواع العقوبات اللي تم فرضها على برنامجها النووي، وساعتها خسرت إيران حوالي نصف عائدات تصدير النفط و30% من التجارة الخارجية.

 

القرار مش هيأثر على روسيا بس

 

منع نظام سويفت المالي  هيأثر على روسيا ازاي؟

 

الشركات الروسية هتفقد الدخول للمعاملات السلسة واللحظية اللي بيوفرها نظام سويفت المالي، وكمان هتتأثر المدفوعات الخاصة بمنتجات روسيا المهمة في قطاع الطاقة والزراعة بالسلب بدرجة كبيرة جدًا.

ومن المنتظر إن البنوك هتضطر للتعامل مباشرة مع بعضها البعض ودا هيخلي الأمور تاخد وقت وتكاليف أكتر، وفي النهاية هيتسبب في قطع الإيرادات عن الحكومة الروسية.

 

2014 والخروج السريع!

 

لو رجعنا لسنة 2014 هنلاقي إن روسيا كانت مهددة بالخروج السريع من نظام سويفت المالي لما ضمت شبه جزيرة القرم، لكن روسيا قررت وقتها إنها تطور من نظام النقل الخاص بيها خارج الحدود، ومش بتستخدمه دول كتير حاليًا.

لكن روسيا لحفت نفسها وعملت نظام بطاقات الدفع الوطني المعروف باسم "مير"، وذلك للتعامل مع المدفوعات عبر البطاقات.

 

ايه اللي هيضر روسيا من خروجها من نظام سويفت المالي؟

 

  • ضرر الشركات اللي بتزود روسيا بالسلع وتشتري منها، زي ألمانيا.
  • روسيا تعتبر المزود الرئيسي للنفط والغاز الطبيعي في الاتحاد الأوروبي، والبديل مش بالسهولة الكافية.
  • الحكومات الغربية مش كلها موافقة على موضوع خروج روسيا من نظام سويفت المالي.
  • هتكون الشركات الدائنة لروسيا عليها توجد طرق بديلة لتحصيل الأموال.
  • ممكن كمان تحصل فوضى مصرفية دولية كبيرة.
  • بالنسبة لروسيا ممكن يحصل تقليص في الاقتصاد الروسي بنسبة 5%.
  • التقارير الاقتصادية قالت إن ممكن يكون التأثير دائم ممكن يكون سريع، خاصة إن روسيا ممكن توجه مدفوعاتها وتتعاون مع الصين بشكل أكبر.

 

ايه اللي هيحصل في النهاية؟

 

لغاية دلوقتي الخبراء من "المشرعين" في أمريكا مش موافقين على حظر نظام سويفت المالي على روسيا كمان الرئيس الأمريكي جو بايدن قالها بشكل صريح إنه بيفضل فرض عقوبات تانية لأن حظر النظام على روسيا هيتسبب في تضرر اقتصادات ودول تانية.

قرار وقف وصول روسيا لنظام سويفت لغاية دلوقتي هيفضل محتاج لدعم من الحكومات الأوروبية اللي كتير منها متردد في الموافقة علشان هما كمان هيعانوا واقتصادهم هيتأثر.

اختيار المحررين

إيه هو نظام التأمين في مصر؟ وايه هي أنواعه؟


faydety logo text
google
apple

سياسة فايدتى

إخلاء المسئولية

سياسة خصوصية

شروط الاستخدام

فايدتى للوساطه فى التأمين

رقم التسجيل فى هيئة الرقابة المالية: 105

للتواصل و الشكاوي : 01003866521

الإيميل : [email protected]


في حالة عدم رضائك عن الخدمة يحق لك تصعيد الشكوى الى مقر الهيئة العامة للرقابة المالية أو عبر موقعها الإلكتروني www.fra.gov.eg

موقع فايدتي حاصل على موافقة الهيئة العامة للرقابة المالية بتاريخ 1/9/2021

للتعرف علي دليل حماية المتعاملين أضغط هذا الرابط