ليه محتاج تودي أطفالك معرض الكتاب السنة دي؟

في 5 فبراير من كل سنة العالم بيشجع كل الآباء إنهم يساعدوا الأطفال يروحوا المكاتب ويتعرفوا أكتر على الكتب ويحبوا القراءة وبمناسبة اليوم دا اللي قرب ممكن تاخد طفلك أو طفلتك وتروحوا معرض الكتاب الدولي في دورته الـ 53 واللي موجود في التجمع الخامس.

معرض الكتاب الدولي 2022 بدأ بالفعل الأسبوع اللي فاتت، وتحديدًا يوم الخميس 27 يناير وهيستمر لغاية يوم 7 فبراير 2022 تحت شعار "هوية مصر.. الثقافة وسؤال المستقبل"، والسنة دي هتكون مختلفة شوية عن السنين اللي فاتت.

اعرف أكتر عن معرض الكتاب الدولي من هنا: كل اللي عاوز تعرفه عن معرض الكتاب الدولي 2022

مواعيد المعرض وتروح ازاي؟

بالنسبة لساعات العمل بتكون من 10 الصبح لـ 8 بالليل، لكن يوم الجمعة البداية هتكون من 1 الضهر، ويوم الخميس والجمعة بيتمد ساعة إضافية يعني بيقفل على 9.

كمان هيكون في خطوط مواصلات من الميادين الرئيسية متخصصة من وإلى معرض الكتاب.

في جناح لكتب الأطفال في معرض الكتاب الدولي بالتجمع الخامس

جناح مخصوص للأطفال في معرض الكتاب

هتلاقي في جناح مخصص لكتب الأطفال في معرض الكتاب الدولي بالتجمع الخامس، قاعة 5، ولطيف جدًا عامل زي الملاهي والأماكن اللي كلها لعب وبتشد الأطفال وكمان الألوان مبهجة. 

الممتع السنة دي في معرض الكتاب الدولي استخدام تقنيات حديثة في عالم الذكاء الاصطناعي بتظهر شخصية الأديب يحيى حقي بتقنية الهولوجرام في عرض تفاعلي مع الجمهور، من خلال شاشة تعمل باللمس.

كمان من خلال نضارات الD3 تقدر تشوف مع أطفالك مجسمات افتراضية لقصص الأديب الراحل عبد التواب يوسف. 

بمناسبة كلامنا عن الأطفال اعرف أكتر: إزاي بيأثر على ميزانيتك : مسئولية الأطفال وتربيتهم

ايه المفيد فعلًا في إن الطفل يحب القراءة من صغره؟

• مهاراته هتبقى أفضل وكمان هيقضي وقته في حاجة مفيدة بدل الموبايل والتليفزيون طول الوقت ودا هيفرق في شخصيته.
• هيسهل على الأم إنها توصله كتير من المعلومات بطريقة ممتعة بدل التلقين.
• فتح باب مناقشة مع الأب والأم.
• خياله هيبقى واسع ودا هيأثر على فهمه لحاجات كتير حواليه ويشغل دماغه بشكل أفضل.
• القراية هتزود مهارات الطفل في القراءة والكتابة وحصيلة الكلمات اللي هيقصدر يحصلها.
• هتساعده في التركيز وطرح أسئلة أكتر.