faydety-logo-text

يعني إيه استحواذ؟ وايه هي أنواعه

تاريخ النشر: 17 سبتمبر 2020

عالم المال

يعني إيه استحواذ؟ وايه هي أنواعه

اعرف معني الاستحواذ فى عالم الشركات والبيزنس

الاستحواذ هو لما شخص أو شركة تشتري الجزء الأكبر من شركة تانية فتبقى هي المتحكمة فيها أو ممكن تشتريها كلها، لو حد اشترى 51% أو أكتر من شركة تانية، الإدارة والتصرف في أمور الشغل بيروحوا للشركة المستحوذة.

 

أنواع الاستحواذ:

 

استحواذ متفق عليه:

 

ساعتها الشركة اللي عايزة تشتري بتعمل عرض وتقدمه لملاك الشركة اللي عايزه تشتريها، وليهم حق الرفض أو القبول. وفي أوقات ملاك الشركات ممكن يبقوا عايزين يبيعوا شركاتهم أو يبيعوا الجزء الكبر منها، وساعتها بيلجئوا لخبراء الدمج والاستحواذ عشان يعرفوا يبيعوا الشركة بدون مشاكل ويلاقوا العرض المناسب لهم.

 

استحواذ عدائي:

 

وده عادة بيحصل للشركات المطروحة في البورصة، وساعتها الشركة اللي عايزة تشتري بتحاول تلم أكبر عدد من أسهم الشركة التانية عشان تملك حق الإدارة، وساعتها الشركة اللي تم الاستحواذ عليها ما تبقاش عارفة إن ده هيحصل وغالباً بتبقى الإدارة مش عايزة إن الاستحواذ ده يتم، وبيبقى في عنصر المفاجأة في عملية الاستحواذ. الشركة المستحوذة عادة بتروح لحاملي الأسهم على طول وتشتري منهم الأسهم بدون علم الشركة التانية.

 

ممكن الاستحواذ يبقى أسهل حل بالنسبة لشركة كبيرة إنها تدخل سوق جديد، خاصة لو في بلد تانية.

 

أسباب الاستحواذ:

 

1. إلغاء المنافسة:

 

الشركة المستحوذة ساعتها بتبقى عايزة تسيطر على السوق وتلغي المنافسة تماماً، وأحسن مثال لده هو بيع شركة كريم لشركة أوبر.

 

2. دخول سوق جديد:

 

في أوقات، ممكن الاستحواذ يبقى أسهل حل بالنسبة لشركة كبيرة إنها تدخل سوق جديد، خاصة لو في بلد تانية، وساعتها بيبقى هيكل الشركة موجود من الأول، وكل اللي عليهم يعملوه هو الإدارة.

 

3. الحصول على تكنولوجيا جديدة أو خبراء:

 

عند الاستحواذ، ممكن الشركة الصغيرة تستنفع بموارد الشركة الكبيرة، أو حتى لو هم شركتين في نفس الحجم، ممكن شركة منهم يكون عندها خبراء تستفيد منهم الشركة التانية.

 

4. الحصول على سيولة:

 

ممكن الشركة المراد استحواذها تكون فلوسها كلها مربوطة في أصول، وعند الاستحواذ، ملاك الشركة بيجيلهم سيولة أكبر.

 

الخلاصة:

 

رغم إن الاستحواذ جزء مهم من دورات الشركات، إلا إن عادةً الاستحواذ اللي بنسمع عنه بيبقى للشركات الكبيرة فقط، ولكن الموضوع بيحصل كتير ما بين الشركات الصغيرة ممكن عشان يعززوا موقفهم في السوق، أو لإسباب تانية.

اختيار المحررين

إيه هو نظام التأمين في مصر؟ وايه هي أنواعه؟


faydety logo text
google
apple

سياسة فايدتى

إخلاء المسئولية

سياسة خصوصية

شروط الاستخدام

فايدتى للوساطه فى التأمين

رقم التسجيل فى هيئة الرقابة المالية: 105

للتواصل و الشكاوي : 01003866521

الإيميل : [email protected]


في حالة عدم رضائك عن الخدمة يحق لك تصعيد الشكوى الى مقر الهيئة العامة للرقابة المالية أو عبر موقعها الإلكتروني www.fra.gov.eg

موقع فايدتي حاصل على موافقة الهيئة العامة للرقابة المالية بتاريخ 1/9/2021

للتعرف علي دليل حماية المتعاملين أضغط هذا الرابط