التأمين الطبي vs التأمين على الحياة

محدش فينا بيقدر يتحكم في مواعيد أي مشكلة ممكن تحصله، وهنا بيظهر الدور المهم للتأمين زي لو عملت حادثة بالعربية على الطريق أو حادثة شخصية وأنت معدي الطريق أو مشاكل صحية ومحتاج فلوس علشان العلاج.

التأمين له أنواع كتير وكل نوع له تغطياته ومميزاته بس خلينا نتكلم عن نوعين والفرق بينهم وهما التأمين الطبي والتأمين على الحياة.

1- التأمين الطبي

التأمين الطبي عبارة عن الحصول على التغطية التأمينية لتكاليف علاج الحالات المرضية اللي ممكن يتعرض لها المؤمن عليه، لأن ببساطة لو اتحمل تكلفتها بنفسه من غير تأمين ممكن توصل لتحمل مبالغ كبيرة غير متوقعة أو اللجوء للسلف لتغطية تكاليف العلاج (في حالة التعرض لأمراض علاجها مُكلف).

ايه هي مميزات التأمين الطبي؟

أسعار شركات التأمين الصحي في مصر بتختلف حسب نوع كل وثيقة وشركات التأمين عادةً بتقدم مستويات متنوعة من التغطية والمزايا اللي تناسب الاحتياجات والميزانيات المختلفة ولكل نوع حد أقصى محدد للاستهلاك السنوي.

وطبعًا أحسن شركات التامين الطبي هي اللي نسبة التغطية فيها أعلى وسعرها مناسب، وفي كل الحالات القسط دايماً بيكون أقل من تحمل تكلفة الكشف والعلاج لوحدك.

وتغطيات شركات التأمين الطبي بتشمل:

·       الكشوفات الخارجية و الأشعة والتحاليل والأدوية.

·       العلاج والإقامة داخل المستشفيات.

·       العمليات الجراحية المختلفة.

·       تغطية الحمل و الولادة بشرط حدوث الحمل بعد سريان الوثيقة.

·       ممكن إضافة تغطية الأسنان وأمراض العيون والأمراض الحرجة بتكلفة إضافية.

تعرف ايه عن التأمين وأنواعه المختلفة؟ تقدر تعرف دلوقتي من هنا إيه هو نظام التأمين في مصر؟ وايه هي أنواعه؟

ايه هي نسبة التحمل في وثيقة التأمين الطبي؟

هي النسبة اللي بيتحملها العميل من تكلفة الخدمة الطبية، يعني مثلاً لو اشتريت دواء ونسبة التحمل 10% ده يعني انك هتدفع 10% من تكلفة العلاج وشركة التأمين بتدفع الباقي اللي هو 90%.

وفي معظم الأوقات الشركة بتتحمل 100% من نسبة العلاج الداخلي وجراحات اليوم الواحد في المستشفيات المتعاقد معاها ضمن الشبكة، وده بيعتمد على نوع الوثيقة، ففي بعض الوثائق مش بتشترط على المؤمن له المشاركة في دفع التكاليف.

وبعض الوثائق تشترط دفع نسبة معينة من التكاليف، وده حسب اتفاق الشركة مع المؤمن له بس بشكل عام، قيمة وثيقة التأمين اللي مش بيشترك فيها المؤمن له بدفع نسبة من التكاليف بتكون أعلى من قيمة الوثيقة اللي يشترك فيها المؤمن له بدفع نسبة من التكاليف.

إيه هي الأمراض السابقة لتاريخ التعاقد، وازاي تتعامل معاها؟

دي الأمراض اللي بيشتكي منها المؤمن عليه من قبل الاشتراك في التأمين و بيتم استثنائها من التغطية التأمينية بالكامل أو في بعض الحالات (في تأمين موظفين للشركات فقط) بيتم تغطيتها بحد أقصى محدد من الحد الأقصى الإجمالي للبوليصة.

إيه الأمراض اللي بتستثنيها شركات التأمين الطبى فى مصر؟

1-   عمليات التجميل، إلا إذا كانت العملية الجراحية ضرورية بسبب تشوه ناتج عن حادث والعملية الجراحية اتعملت بسبب التشوه ده.

2-   الفحوصات الطبية الروتينية زي فحص التوظيف مثلاً أو السفر.

3-   المنشطات والفيتامينات.

معظم شركات التأمين الطبي بتقدم وثايق للأفراد لوحدهم أو شاملة أسرهم، باختلاف عدد الأطفال أو إذا كنت عايز تضيف شريك حياتك ولا لأ

2- التأمين على الحياة

وهنا الموضوع مختلف شوية لأن الشخص بيطلب يأمن على حياته لصالح المستفيدين اللى بيحدد أسماؤهم في وثيقة التأمين، ومدة التأمين بتبقي لفترة معينة مثلا لـ سن 65 أو 70 ومش بتفرق إذا كانت الوفاة حدثت بسبب حادثة ولا طبيعية.

الشركة بتدفع التعويض في الحالة دي

في حالة إن الوفاة حصلت في خلال مدة التأمين، الشركة بتدفع التعويض المالي للمستفيدين اللى صاحب الوثيقة محددهم، ولو محصلتش الوفاة، الشركة مش بتدفع أي مبلغ، وبيبقى عندك فرصة تجدد الوثيقة لو حابب.
 

ممكن نقسم فروع التأمين على الحياة للأقسام دي:

·       التأمين ضد خسائر خطر الحياة.

·       التأمين ضد خسائر خطر الوفاة.

·       التأمين ضد خسائر خطري الحياة والوفاة مع بعض.

دلوقتي بعد ما عرفت الفرق بين التأمين على الحياة والتأمين الطبي اعرف أكتر من هنا عن ايه الفرق بين تأمين الحوادث الشخصية والتأمين على الحياة؟