مين بيكسب أكتر: الـ Full timeولا الـ Freelancerالمصورين

في الفترة الأخيرة في مصطلح انتشر اوي وهو شغل "الفريلانس"، ومعناه انك بتشتغل لوحدك ومش تبع شركة معينة. وطبعا في ناس كتير بتفضل طبيعة الشغل دي علشان يكونوا حرين في اختياراتهم ومواعيدهم. في سلسلة المقالات دي هنقارن عدد من الوظايف ونعرف مين بيكسب أكتر اللي شغالين حرين/Freelance ولا اللي بدوام كامل/Full time.

وظيفة المصور/Photographer،

بقينا بنحتاج الـ Photographer  كتير مش بس في المناسبات زي الخطوبات والأفراح بس كمان عشان يصور أي Event مهم، ودي وظيفة بتعتمد في الأساس على الموهبة وبعدين بتطور مع الكورسات والورش.

احنا هنقولك على 5 نقط مهمين لازم تعرفهم وبعدها قرر إذا كانت بتفضل تشتغل فى شركة ولا حر طليق!

1- الأستقرار:

• Full time: أهم حاجة بتميزه هو استقرار المكان، ده غير ضمان حقوقك من تأمين صحي واجتماعي.
• Freelance: أما لو قررت تبقي حر فـ هتبقي قررت تتنازل عن حقوقك في التأمينات، بس ممكن تشترك مع نفسك في التأمين الصحي الشامل الجديد.

2- الدخل: 

• Full time: المرتب بيكون ثابت كل شهر حتى لو الشغل اللى بتعمله قل أو زاد وممكن يبقي فيه زيادات سنوية، ومرتبات المصورين في مصر في الشركات بـ تتراوح بين 2700 جنيه - 8000 جنيه
• Freelance: أما بالنسبة للمرتب فـ ممكن تلاقي نفسك بتشتغل شهر تجمع مبلغ معين والشهر اللي بعده متشتغلش، ده غير أن مفيش Event  سعره زي التاني، والعكس صحيح ممكن يحقق في الشهر الواحد أضعاف اللى مرتب الـ Full time.

الدخل بيختلف علي حسب العميل والمناسبة، اللي أِشهرها مناسبات الجواز:

• سيشن الخطوبة بتبدأ من 1000 جنيه وبتوصل لـ 5000 جنيه لو هتاخد فيديو وألبوم
• سيشن الفرح بتبدأ من 5000 جنيه وبتوصل لـ 10,000 لو هتصور الفرح كله

أما بالنسبة لتصوير المنتجات فـ يوم التصوير بيبدأ من 5000 جنيه وبيوصل لـ 15 ألف جنيه، أي أن كان عدد الـ products.

المصور محتاج يبني اسمه والـ Brand بتاعه وينتشر في السوق عشان يقدر يطلب المبالغ اللي يستحقها، ده غير أنه محتاج يعمل علاقات كتيرة ويطور من مهاراته أول بأول

3- المصاريف :

• Full time: لو في شركة فـ هيجيلك كل الادوات اللى هتبقى محتاجها زي: الكاميرا، وعدستها، والكمبيوتر….إلخ
• Freelance: لازم تبقى عامل حسابك انك هتجيب كل الأدوات اللى محتاجها لنفسك

4- قواعد الشركة:

• Full time: لو شغال في شركة لازم تتابع قواعدها ، من مواعيد العمل الرسمية، للهدوم المسموح بيها، ….إلخ
• Freelance: مفيش مواعيد ولا قيود على افكارك، وانت اللي هتبقي حاطط القواعد اللي هتمشي عليها

5- فريق العمل:

• Full time: من أكبر المميزات اللى هتلاقيها في الشركة انك هتفكر مع الفريق اللى بتشتغل معاه وممكن توصلوا لأفكار جديدة تناسب rules شركتكم، وده هيساعدك متدخلش في مرحلة الـ Creative Block اللي ممكن توقف دخلك لو شغال لوحدك.
• Freelance: هتفكر لوحدك وتخرج كل المهارات اللي عندك وأنت بتصور وتطبق كل حاجة اتعلمتها، لكن للأسف محدش هيساعدك

باختصار الـ Freelance  في الشغلانة دي بيكسب أكتر من اللي بيرتبط بشركة، لكن محتاج يبني اسمه والـ Brand بتاعه وينتشر في السوق عشان يقدر يطلب المبالغ اللي يستحقها، ده غير أنه محتاج يعمل علاقات كتيرة ويطور من مهاراته أول بأول.