إيه مكونات استمارة طلب التأمين، والفرق بينها وبين الوثيقة!

استمارة طلب التأمين أو طلب التأمين هو أول مستند هتقدمه لشركة التأمين، واللي فيه بتقول لشركة التأمين أنا عاوز اشتري تأمين لكذا ودا طبعًا بيكون قبل كتابة عقد التأمين نفسه، وطلب التأمين اللي بيكتبه هو طالب التأمين ويوقع عليه بنفسه كمان.

الفرق مابين استمارة طلب التأمين ووثيقة التأمين:

-استمارة طلب التأمين هي طلبك للحصول على الوثيقة وتعتبر أول خطوة ليك فى عالم التأمين بعد مراجعتك للشركات المختلفة.

-وثيقة التأمين هي الورقة اللي بتأكد حقك فى التأمين وبتحتوي على كل المعلومات اللي محتاج تعرفها على الوثيقة اللي اشتريتها.

طالب التأمين بيقدم استمارة طلب التأمين، وبيكتب فيها كل الحقائق والمعلومات عن الحاجة اللي عاوز يأمن عليها

هنقولك طلب التأمين بيحتوي على ايه، وازاي تضمن حقك:

1- طالب التأمين:

طالب التأمين بيقدم استمارة طلب التأمين، وبيكتب فيها كل الحقائق والمعلومات عن الحاجة اللي عاوز يأمن عليها زي وصف البناء لو عاوز يأمن على بيته أو الشئ اللي عاوز يأمن عليه عمومًا.

لازم المعلومات دي تبقى سليمة 100%، ودا بيكون اسمه "مبدأ حسن النية في التأمين"، وتأمينك يكون له مصلحة مشروعة وقت كتابة العقد يعني إن تبقى أنت المتضرر لو حصل ضرر للشئ اللي مأمن عليه، ولازم تكون موجود وقت وقوع الحادث علشان يحصل المؤمن له على تعويض.

خلي بالك!

حط في اعتبارك وأنت بتأمن لا يجوز تحويل المصلحة التأمينية على المباني والمحتويات إلا للدائن  أو للمالك الجديد بس مش حد تاني غيرهم.

2- إبلاغ شركة التأمين:

المؤمن لازم يبلغ الشركة فورًا لو حصل أي شئ جديد على الشيء المؤمن عليه خلال مدة التأمين، يعني أي تعديلات تحصل لازم تبلغ الشركة زي مثلًا لو هتسيب البيت مدة 30 يوم أو إنك تأجره.

ولو كمان عاوز تعمل أي تعديلات في وثيقة التأمين زي مثلًا إنك تغير من طبيعة الخطر المؤمن ضده أو في قيمة مبلغ التأمين نفسه أو تنقل الأشياء المؤمن عليها أو أي تفصيلية مش موجودة في وثيقة التأمين لازم تبلغ الشركة.