يعني ايه تأمين صحي شامل؟ وايه هي مميزاته؟

دايما هتلاقي بين عيلتك واصحابك، مجموعة بتتعالج مع التأمين الطبي اللى تبع شغلهم، وفيه اللي بيتعالج على نفقة الدولة، وفيه اللى بيتعالج على حسابه…...إلخ. ولإن التعب بيجي فجأة، ومش كل الأوقات بنبقى قادرين على تكلفة الدكاترة والعلاج، الحكومة سهلتها علينا وعملت مشروع "التأمين الصحي الشامل" اللي هيساعد كل المصريين يتعالجوا وبتكلفة بسيطة.

ايه هو التأمين الصحي الشامل؟

هو مشروع عملته الحكومة المصرية فى النص التاني من 2019، وهو برنامج تكافلي اجتماعي الهدف منه تقديم خدمات صحية بـ جودة عالية لكل فئات المجتمع، وكمان الدولة بتدفع كل تكاليف العلاج لغير القادرين.

الصفحة الرسمية للمشروع على الفيسبوك: التأمين الصحي الشامل

التأمين الصحى الشامل إجباري و هتتعالج بتكلفة بسيطة جدا

المشروع ده اتكلف حوالي من 80 لـ 120 مليار جنيه، وهيتم تطبيقه في كل محافظات مصر خلال 15 سنة بداية من 2019، وبورسعيد كانت أول المحافظات اللى اتطبق فيها التشغيل التجريبي للنظام التأميني، ولمدة شهرين نجحوا انهم يعملوا 3693 عملية جراحية، وبعدها جت محافظة الاسماعيلية وسجلوا 900 ألف من سكانها فى التأمين، وده حوالي 66% من إجمالي سكان محافظة الإسماعيلية وده كان من شهر أكتوبر 2019 ولحد شهر سبتمبر 2020.

ايه هي مميزات التأمين الصحي الشامل؟

• كل مواطن هيبقى ليه الملف بتاعه عند طبيب الأسرة، وهيكون فيه التاريخ المرضي بتاعه عشان يكون في متابعة مستمرة مع الدكتور
• المريض هيساهم فى علاجه بـ نسبة بسيطة، 5% بحد أقصى فى العمليات و10% على الأشعة والتحاليل
• الاشتراك فى التأمين الصحي الشامل اجباري لـ كل المصريين

ايه هي الشروط  اللي لازم تعرفها عشان تستفاد بخدمة التأمين الصحي الشامل؟

لازم  تكون مشترك بـ التأمين الصحي وبتدفع كل الأقساط فى ميعادها، وفي حاله انك مدفعتش فى الميعاد المحدد ليك، بتتوقف الخدمة ما عدا في حالات الطوارئ.